(ភ្នំពេញ)៖ តារាចម្រៀងពូកែស្រែកមិនបែកសំឡេង ប្រចាំផលិតកម្មថោន លោក ពេជ្រ ថាណា ត្រូវបានទស្សនិកជន សម្គាល់ឃើញលោកពិតជាមានកេរ្តិ៍ឈ្មោះ ក៏ដូចជាប្រជាប្រិយភាព ខ្លាំងក្នុងសង្គមសិល្បៈ ខណៈដែលតារាចម្រៀងប្រុសរូបនេះ ទើបតែចូលមកកាន់ទ្រនំផលិតកម្មថោន ក្នុងរយៈពេលខ្លីតែប៉ុណ្ណោះ។ យ៉ាងណាមិញ ខណៈប្រជាប្រិយភាពរបស់ លោក មានការកើនឡើងពីមួយថ្ងៃទៅមួយថ្ងៃបែបនេះ ស្រាប់តែតារាចម្រៀងសំឡេងផ្អែម ស្រែកបានខ្ពស់រូបនេះបានពោលថា លោកនឹងធ្វើឲ្យអ្នកដែលពូកែមើលងាយខ្លួន ពេលដែលលោកនៅគ្រាក្រឲ្យបានភ្លឺភ្នែកម្ដង នៅក្នុងរយៈពេលតែ ២ឆ្នាំខាងមុខទៀត។
ជាក់ស្ដែង យោងតាមគណនីហ្វេសប៊ុកផ្លូវការ របស់តារាចម្រៀងលោក ពេជ្រ ថាណា បានសរសេរសារបង្ហោះ ដោយមានអត្ថន័យយ៉ាងដូច្នេះថា «ជឿថាពេលយើងក្រ គ្មានអ្នកស្គាល់យើងអត់ ខ្ញុំជឿព្រោះតែចឹងទើបខំប្រឹង ក្រែងលោវាបានអីៗនឹងគេ មិនយូរទេរយៈពេល ២ឆ្នាំទៀត អីៗចេញហើយ កុំពូកែមើលងាយគេពេក»។តើលោកមានគម្រោងធ្វើអ្វីមួយ ដើម្បីលេចចេញជារូបរាងនៅ ២ឆ្នាំទៀតនោះ? ហើយនណាបានមើលងាយលោកនោះ លោកមិនបានបញ្ចាក់និងបង្ហាញនោះទេ។
លោក ពេជ្រ ថាណា ជាតារាចម្រៀងមួយដួង ដែលមានប្រជាប្រិយភាពខ្លាំងគួរសម ស្ទើរតែមិនចាញ់តារាចម្រៀង ល្បីៗផ្សេងៗទៀត ខណៈដែលបទចម្រៀងនីមួយៗរបស់លោក សុទ្ធសឹងតែមានការគាំទ្រពីប្រិយមិត្តទស្សនិកជន ពិសេសមិត្តយុវវ័យតែម្ដង៕
