(ភ្នំពេញ)៖ កាលពីថ្មីៗនេះ កញ្ញា ទេព បូព្រឹក្ស ទើបតែបានបញ្ចេញ នូវស្នាដៃបទចម្រៀងថ្មី មានចំណងជើងថា «DON’T TALK BOUT HATERS» បន្ទាប់ពីតារាចម្រៀងស្រីរូបនេះ ទទួលរងនូវការរិះគន់ ពីសំណាក់ទស្សនិកជន ខណៈដែលចម្រៀងមួយបទនេះ កំពុងតែមានការទាក់ទាញខ្លាំង ពោលគឺចម្រៀងរបស់កញ្ញា ទេពបូព្រឹក្ស និពន្ធ និងបកស្រាយឡើង ក្នុងបំណង ថាឲ្យអ្នកដែលចាំតែរិះគន់នាងតែម្ដង។
យ៉ាងណាមិញ គ្រាន់តែបទចម្រៀងនេះ បង្ហោះនៅលើបណ្ដាញសង្គមភ្លាម ស្រាប់តែតារាចម្រៀងប្រុស លោក សុគន្ធ ថេរ៉ាយុ បង្ហាញអារម្មណ៍ពេញចិត្តស្ដូកតែម្ដង ចំពោះបទចម្រៀងថ្មីរបស់កញ្ញា ទេព បូព្រឹក្ស ខណៈកន្លងមកលោកក៏ធ្លាប់បានទទួលរងនូវការរិះគន់ខ្លាំងពីសំណាក់មហាជន ទៅលើការប្រើប្រាស់សម្ភារៈនិយមផងដែរ។
ជាក់ស្ដែង តារាចម្រៀងប្រុសប្រចាំផលិតកម្មថោន លោក សុគន្ធ ថេរ៉ាយុ បានស៊ែរ ព្រមទាំងបានសរសេរសារយ៉ាងដូច្នេះថា «សុំស៊ែរបទនេះមួយដែរហើយ ត្រូវចិត្តខ្លាំងពេក Tep Boprek ជាពិសេសផ្ញើជូនអ្នកដែលនិយាយថា (ចង់ទិញអីទិញទៅ ជិះឡានអីជិះទៅ កុំតែពេលឈឺប្រកាសរកជំនួយ) ស្អប់ពាក្យហ្នឹងណាស់ ហើយលុយគេសោះ ម៉េចបានឈឺចាប់ម៉េស ចាំគេសុំជំនួយ ចាំដើរថាឲ្យគេ ចង់ថា ថាតែបុគ្គលទៅបានហើយ កុំរាលដាលដល់គេ នឹកឃើញម្តងៗចង់តែ..ហ៊ឹម ទៅខ្ជិលនិយាយ»។
មួយរយៈកន្លងតារាចម្រៀងស្រីរូបនេះ បានបញ្ចេញនូវបទ «DON’T TALK BOUT HATERS» ក្រោយពីកញ្ញា ទេព បូព្រឹក្ស និងគូស្នេហ៍ លោក G-Devith បានទទួលរងនូវការរិះគន់ មិនសំចៃមាត់ពីអ្នកលេងបណ្ដាញសង្គម ។
តោះ! ស្ដាប់ទាំងអស់គ្នាមើល៍ តើបទនេះមានន័យឌឺដងធ្ងន់ធ្ងន់កម្រិតណា ដល់អ្នករិះគន់លើតារាស្រុកខ្មែរ?