(ភ្នំពេញ)៖ លោក ខេមរៈ សិរីមន្ត ត្រូវបានគេសង្កេតឃើញថា ទោះបីជាលោកបានបង្ហាញមុខភរិយាក៏ដូចជាកូនប្រុសស្រី ឲ្យប្រិយមិត្តទស្សនិកជនស្គាល់ក្ដី តែប្រជាប្រិយភាព និងភាពល្បីល្បាញរបស់លោក នៅតែកើនឡើងពីមួយថ្ងៃទៅមួយថ្ងៃ ។ ខណៈថ្មីៗនេះ លោកបានបង្ហាញភាពផ្អែមល្ហែម និងបញ្ចេញសារលើកសរសើរពីអត្តចរិត របស់ភរិយាខ្លួន ធ្វើឲ្យប្រិយមិត្តទស្សនិកជន បានឮហើយស្ទើរតែលើសជាតិស្ករ ព្រោះតែសារនោះមានន័យជ្រៅស្ទើរស្មានមិនដល់។
លោកខេមរៈ សិរីមន្ត បានបង្ហាញរូបភាពផ្អែមល្ហែម ជាមួយនឹងភរិយារួមទាំងកូនប្រុសស្រី ដោយបានសរសេរសារដ៏មានអត្ថន័យថា «បងជាប្តីធម្មតាៗម្នាក់ប៉ុណ្ណោះ អូនទើបជាភរិយាដ៏ល្អ តាំងពីពួកយើងស្រឡាញ់គ្នាមក អូនមិនដែលចង់បានអ្វីពីបងឡើយ អូនថាសុំត្រឹមមានបងក្បែរនិងស្រឡាញ់អូន គឺគ្រប់គ្រាន់ហើយសំរាប់អូន បងមានសំណាងណាស់ដែលមានអូនជាភរិយា»។
យ៉ាងណាមិញ ក្រោយពីលោក ខេមរៈ សិរីមន្ត បានបើកបង្ហាញមុខភរិយា និងកូនប្រុសស្រី ឲ្យមហាជនអ្នកគាំទ្របានដឹងជាសាធារណៈហើយនោះ គេសង្កេតឃើញថា លោកកាន់តែបង្ហាញភាពផ្អែមល្ហែមខ្លាំងជាមួយភរិយា ដែលធ្វើឲ្យទស្សនិកជនមិនតិចនាក់នោះទេលួចច្រណែននឹងរូបលោក។ ទន្ទឹមគ្នានេះដែរ ក្រោយពីបានបង្ហោះសារបែបនេះធ្វើឲ្យអ្នកគាំទ្រទាំងឡាយ សម្តែងក្តីរំភើប និងកោតសរសើរថា ខេមរៈ សិរីមន្ត និងក្រុមគ្រួសារពិតជាមានសុភមង្គល។
គិតមកទល់នឹងពេលនេះ លោក ខេមរៈ សិរីមន្ត បានសាងស្នាដៃចម្រៀង ដែលទទួលបានការគាំទ្រយ៉ាងច្រើនពីសំណាក់ទស្សនិកជនដូចជាបទ «ស្ទឹងត្រែងបងអើយ», «អស់សិទ្ធថែតែនៅបារម្ភ» និងបទ «សង្សារអើយឲ្យបងសុំទោស» ជាដើម សុទ្ធសឹងតែជាបទល្បីល្បាញ និងទទួលស្គាល់ពីមិត្តយុវវ័យ៕