(ភ្នំពេញ)៖ ខណៈដែលអ្នកសិល្បៈគ្រប់រូបបាននាំគ្នាយ៉ាងសស្រាក់សស្រាំ ចូលរួមបរិច្ចាគថវិកាផ្ទាល់ខ្លួន ដើម្បីជួយទប់ស្កាត់ការរីករាលដាលនៃជំងឺកូវីដ១៩ នៅក្នុងប្រទេសកម្ពុជា ស្រមតាមការអំពាវនាវរបស់ថ្នាក់ដឹកនាំប្រទេស។ ចំណែកឯតារាចម្រៀង ឆាយ វីរៈយុទ្ធ និងភរិយា ឯណេះវិញ លោកបែរជាចូលរួមឧបត្ថម្ភជាអង្ករចំនួន៦តោន ដើម្បីចែកជូនដល់សិល្បករ-សិល្បការិនីចាស់ជរា ក្នុងរដូវកាលជំងឺកូវីដរាតត្បាត និងចែកជូនដល់អ្នកក្រីក្រ តាមរយៈសមាគមសិល្បករខ្មែរ ជាអ្នកចាត់ចែង។
យោងតាមគណនីហ្វេសប៊ុក លោក ហេង ឡុង បានបញ្ជាក់ថា នៅគ្រាដែលមេរោគកូវីដ-១៩ ឆ្លងរាតត្បាតជាសកល ប្រទេសកម្ពុជាក៏រងផលប៉ះពាល់ផ្នែកសេដ្ឋកិច្ចខ្លះដែរ ជាពិសេសទៅលើចំណូលពីវិស័យសិល្បៈ ព្រោះកម្មវិធីប្រគំតន្ត្រី និងពិធីជួបជុំធំៗត្រូវបានផ្អាក។ ដោយមើលឃើញពីបញ្ហានេះ តារាចម្រៀងល្បីឈ្មោះម្នាក់គឺលោក ឆាយ វីរៈយុទ្ធ និងគ្រួសារ ដែលជាម្ចាស់រោងម៉ាស៊ីនកិនស្រូវ «ហាក់ សែ» បានឧបត្ថម្ភអង្ករម៉ាក «ស្ដេចអង្ករ» ចំនួន៦តោន ដើម្បីឲ្យសមាគមសិល្បៈចាត់ចែង។
លោក ហេង ឡុង បានបន្តថា អង្ករទាំង៦តោននេះ នឹងត្រូវចាត់ចែងដល់អ្នកសិល្បៈចាស់ជរា ឬមានជីវភាពខ្វះខាតចំនួន៣តោន និងចែកជូនពលរដ្ឋខ្វះខាតចំនួន៣តោន ក្នុងគ្រាដែលមេរោគកូវីដ-១៩ រាតត្បាត មិនមានចំណូលគ្រប់គ្រាន់សម្រាប់ផ្គត់ផ្គង់គ្រួសារ។
សូមបញ្ជាក់ថា ក្រសួងសុខាភិបាលកម្ពុជា បានរកឃើញអ្នកឆ្លងមេរោគកូវីដ១៩ (COVID-19) ថ្មី ចំនួន០២នាក់បន្ថែមទៀត ធ្វើឲ្យអ្នកឆ្លងជំងឺកូវីដ១៩ នៅក្នុងប្រទេសកម្ពុជា បានឡើងដល់៩៨នាក់ហើយ គិតត្រឹមយប់ថ្ងៃទី២៦ ខែមីនា ឆ្នាំ២០២០នេះ ខណៈដែលថ្ងៃនេះ មានអ្នកជំងឺដែលត្រូវបានព្យាបាលជាសះស្បើយ ពីជំងឺកូវីដ១៩ ចំនួន០១នាក់ទៀតផងដែរ៕