(ភ្នំពេញ)៖ ទោះបីជាកំពុងពពោះកូនដំបូងក្តី តែកំពូលតារាចម្រៀងស្រីប្រចាំប្រទេសកម្ពុជា អ្នកនាង ឱក សុគន្ធកញ្ញា នៅតែចំណាយពេលជាមួយនឹងស្វាមីដើរលេងកំសាន្តអារម្មណ៍នៅបរទេស យ៉ាងមានសុភមង្គល។ អ្វីដែលអ្នកគាំទ្រចាប់អារម្មណ៍ ឱក សុគន្ធកញ្ញា នៅតែមានសម្រស់ស្រស់ស្អាតដដែល ទោះបីជាទំហំពោះបានខ្ទាតធំជាមុនក៏ដោយ។
ជាការកត់សម្គាល់អ្នកនាង ឱក សុគន្ធកញ្ញា ត្រូវបានមហាជនសង្កេតឃើញថា ការមានផ្ទៃពោះហាក់មិនមានបញ្ហាអ្វីធំដុំក្នុងការងារសិល្បៈរបស់នាងឡើយ ពោលនៅតែមានវត្តមានក្នុងកម្មវិធីធំៗ ដូចជា X Factor Cambodia និងការប្រគុំតន្រ្តីផ្សេងៗរហូត។ គ្រាន់តែថា កាយវិការសម្តែងរាំលើកឆាក មិនសូវហក់លោតខ្លាំងជាងមុន តែយ៉ាងណានាងនៅតែធ្វើឲ្យកម្មវិធីទាំងមូលពោរពេញដោយភាពសប្បាយរីករាយ ជាមួយនឹងរសជាតិថ្មីមួយផ្សេងទៀត។
មានការលើកឡើងថា ក្រោយមានគភ៌ ឱក សុគន្ធកញ្ញា កាន់តែទទួលបានការស្រឡាញ់ថ្នាក់ថ្នមពី ស្វាមីទ្វេដង ខណៈកូនដំបូងរបស់នាង ជាមួយនឹងស្វាមីរូបសង្ហារ អ៉ឹង សុខលី គឺជាកូនប្រុស។ ទន្ទឹមគ្នានេះ ឱក សុគន្ធកញ្ញា ធ្លាប់បានប្រាប់ដល់អ្នកគាំទ្រថា មិនថាកូនប្រុសឬស្រី គឺនាងចង់បានទាំងអស់ គ្រាន់តែមុននិងក្រោយ ព្រោះស្រឡាញ់ និងចង់បានដូចគ្នា។
យ៉ាងណាមិញ ងាកមកការតុបតែខ្លួនស្លៀករ៉ូបយ៉ាងសមសួន ជាមួយនឹងស្បែកជើងប៉ាតា ក្នុងដំណើរកំសាន្តនៅប្រទេសសិង្ហបុរី ជាមួយស្វាមីពេលនេះ ឱក សុគន្ធកញ្ញា បានផ្តិតនូវរូបភាពផ្អែមល្ហែមជាច្រើន សម្រាប់ចែកជូនអ្នកគាំទ្រមើល។ ជាមួយគ្នានេះ ក៏មានការជូនពរជាច្រើនដល់គូស្វាមីភរិយាមួយគូនេះឲ្យស្រឡាញ់គ្នា មានសុភមង្គលជារៀងរហូត ជាពិសេសទស្សនិកជនជូនពរដល់ឱក សុគន្ធកញ្ញា ឲ្យមានសុខភាពល្អផងដែរ៕