(ភ្នំពេញ)៖ លោក សន ពិសិដ្ឋ គឺជាតារាសម្តែងប្រុសមួយរូប ដែលមានភាពលេចធ្លោរ ក្នុងវិស័យឧស្សាហ៍កម្មភាពយន្តកម្ពុជានាពេលបច្ចុប្បន្ន។ ដោយសាររូបរាងស្រស់សង្ហា មានសាច់ដុំធំៗ តារាប្រុសដួងនេះ មិនត្រឹមតែត្រូវបានខាងភាពយន្តនោះទេ ថែមទាំងមានបណ្តាក្រុមហ៊ុននានា ទាក់ទងថតពាណិជ្ជកម្មជាញឹកញាប់ផងដែរ។ តែយ៉ាងណា ក្រៅពីជោគជ័យមួយផ្នែកក្នុងការងារសិល្បៈ ងាកមកបញ្ហាជីវិតស្នេហាវិញ លោក សន ពិសិដ្ឋ ហាក់មិនសមប្រកបឡើយ។ ដូច្នេះចង់ដឹងពីបញ្ហាក្រោយខ្នងក្រៅពីសិល្បៈរបស់លោកយ៉ាងណានោះ លោកនឹងមកបង្ហាញក្នុងកម្មវិធី «អាថ៌កំបាំងក្រៅឆាករបស់តារា»។
ជាការកត់សម្គាល់ ទស្សនិកជនភាគច្រើនតែងតែតាមដាន និងដឹងឮតែជីវិតសិល្បៈរបស់លោក សន ពិសិដ្ឋ ប៉ុណ្ណោះ ពោលមិនបានដឹងពីជីវិតផ្ទាល់ខ្លួនរបស់លោកឡើយ។ បើតាមការបង្ហើបឲ្យដឹង តារាប្រុសរូបនេះ ធ្លាប់មានភរិយា និងមានកូនមួយក្នុងបន្ទុកទៀតផង តែយ៉ាងណាបច្ចុប្បន្នលោកក៏ត្រូវបានគេបង្ហើបបន្ថែមថា ជាបុរសពោះម៉ាយកូនមួយទៅវិញ។ ទោះបីជាការងារសិល្បៈជោគជ័យ តែមិនបានន័យថារឿងស្នេហា ជីវិតផ្ទាល់ខ្លួនជោគជ័យនោះទេ។
ដើម្បីឲ្យជ្រាប់កាន់តែច្បាស់ ទាំងបញ្ហាផ្ទាល់ខ្លួនរបស់លោក សន ពិសិដ្ឋភា ព្រមទាំងការតស៊ូ ពុះពារព្យាយាមនឹងវិស័យសិល្បៈ ទំរាំមកដល់ថ្ងៃនេះ បានឆ្លងការឧបសគ្គអ្វីខ្លះនោះ លោកនឹងមកចូលរួមជាតារាកិត្តិយសក្នុងកម្មវិធី «អាថ៌កំបាំងក្រៅឆាករបស់តារា» នៅថ្ងៃសៅរ៍សប្តាហ៍នេះ ដើម្បីបកស្រាយឲ្យទស្សនិកជនបានជ្រាបកាន់តែច្បាស់។ ជាពិសេសដើម្បីឲ្យតារាប្រុសៗទើបពន្លកថ្មី យកគំរូតាម។ កម្មវិធី «អាថ៌កំបាំងក្រៅឆាករបស់តារា» ធ្វើការផ្សាយផ្ទាល់ពីទូរទស្សន៍ Fresh News នៅយប់ថ្ងៃទី ១៥ ខែមិថុនា ឆ្នាំ២០១៩នេះ នាម៉ោង ៧៖០០នាទី ដល់ម៉ោង ៨៖០០នាទីយប់ ហើយនឹងត្រូវចាក់ផ្សាយឡើងវិញ នៅថ្ងៃអាទិត្យ ទី១៦ ខែមិថុនា ឆ្នាំ២០១៩ វេលាម៉ោងដដែល៕