(ភ្នំពេញ)៖ បើនិយាយពីពាក្យថា «ខ្មុកស្មាច់» ឬ «សិល្បៈខ្មុកស្មាច់» ទស្សនិកជននិងយុវជនភាគច្រើន ហាក់មិនដឹងនោះទេថា តើគឺជាអ្វីមួយនោះ? ព្រោះបច្ចុប្បន្ននេះ មានមនុស្សតិចណាស់ ដែលចាប់អារម្មណ៍ និងស្គាល់នូវជំនាញមួយនេះ។ ជាក់ស្តែង «សិល្បៈខ្មុកស្មាច់» គឺជាជំនាញដ៏ពិសេសម្យ៉ាង ក្នុងការដេរប៉ាក់សម្លៀកបំពាក់នៃរបាំបុរាណ និងគ្រឿងមួយចំនួនដូចជាកងដៃ កងជើង មកុដ ខ្សែក្រវាត់ ខ្សែឆៀង និងក្បាច់ដេរប៉ាក់ដ៏ប្រណីត សម្រាប់ទ្រង់គ្រឿងប្រដាប់ពាក់ជាមួយនឹងឈុតនៃសម្លៀកបំពាក់របាំបុរាណខ្មែរ និងល្ខោនបាសាក់ ក៏ដូចជាការដេរប៉ាក់ស័ក្តិនៃសម្លៀកបំពាក់ សម្រាប់មន្ត្រីរាជការរបស់ខ្មែរយើងជាដើម។ ទន្ទឹមគ្នានេះ លោកស្រី គុម សុគន្ធា ត្រូវបានគេដឹងថាបានចាប់ជំនាញ «ខ្មុកស្មាច់» នេះ ជាង២ទសវត្សវ៍មកហើយ ដើម្បីបន្តថែរក្សាជំនាញពីឪពុក ហើយស្នាដៃរបស់លោកស្រី គឺល្បីល្បាញយ៉ាងខ្លាំងក្នុងសង្គមអ្នកអភិរក្សសិល្បៈបុរាណ និងរឹតតែពិសេសល្បីដល់ប្រទេសក្រៅផងដែរ។
ថ្មីៗនេះស្នាដៃរបស់លោកស្រី គុម សុគន្ធា ត្រូវបានមហាជនចាប់អារម្មណ៍ជាច្រើន ដោយមានការចែកចាយពេញបណ្តាញសង្គមហ្វេសប៊ុក។ ជាមួយគ្នានេះ បើយោងតាមប្រភពច្បាស់ការណ៍មួយបានឲ្យដឹងថា លោកស្រីបានប្រកបរបរជាជាងខ្មុកស្មាច់នេះ គឺបន្តតាំងពីជំនាន់លោកឪពុកលោកស្រីមកម្ល៉េះ ដោយឪពុកលោកស្រីមានឈ្មោះថា អន សុខ ដែលជាអតីតគ្រូបង្រៀនជំនាញសិល្បៈសូនរូប ផ្នែកជំនាញខ្មុកស្មាច់នេះ ហើយលោកក៏មានជំនាញបន្ថែមខាងដេរប៉ាក់ សម្រាប់សម្លៀកបំពាក់នៃរបាំបុរាណ និងល្ខោនបាសាក់ក៏ដូចជាការដេរប៉ាក់ស័ក្តិ នៃសម្លៀកបំពាក់សម្រាប់មន្ត្រីរាជការរបស់ខ្មែរយើងផងដែរ។ ក្រោយពីឪពុកលោកស្រីបានចែកឋានទៅ លោកស្រី គុម សុគន្ធា និងគ្រួសារក៏បានបន្តជំនាញនេះរហូតមកដល់សព្វថ្ងៃ។ សម្រាប់ការប្រកបមុខរបរជាជាងខ្មុកស្មាច់ និងដេរប៉ាកនេះគឺយើងបានចាប់ផ្តើមប្រកបតាំងពី ១៩៩០-៩១ មក។
លោកស្រី គុម សុគន្ធា ជាស្ត្រីខ្មែរវ័យជាង៥០ ឆ្នាំ រូបនេះបានបញ្ចប់ការសិក្សាជំនាញសិល្បៈសូនរូប ពីសាកលវិទ្យាល័យភូមិន្ទវិចិត្រសិល្បៈ ព្រមទាំងបានចាប់ប្រកបអាជីពជាជាង ខ្មុកស្មាច់ និងដេរប៉ាក់លំដាប់ជម្រើសស្នាដៃប្រចាំប្រទេសផងដែរ។ អ្នកស្រី គុម សុគន្ធា បានចាប់ដំណើរការប្រកបរបរនេះតពីលោកឪពុក ដែលមានជំនាញជាជាងខ្មុកស្មាច់ និងដេរប៉ាក់នោះ បន្ទាប់ពីឪពុកលោកស្រីបានចែកឋានមកម្ល៉េះ។ ចំពោះស្នាដៃសិល្បៈប្រភេទនេះ គឺសឹងតែទាំងអស់ចេញពីការផលិតដោយគ្រួសារលោកស្រី គ្រាន់តែលោកស្រីមិនដែលធ្លាប់បានផ្សព្វផ្សាយពីមុនមក ដោយគិតថាខ្លាចគេនិយាយថាចង់ល្បី តែយ៉ាងណាសព្វថ្ងៃនេះក៏អ្នកមានស្គាល់ពីស្នាដៃសិល្បៈខ្មុកស្មាច់ និងដេរប៉ាក់របស់គ្រួសារលោកស្រីយ៉ាងច្រើនផងដែរ ព្រមទាំងបានយកទៅផ្សាយតាមហ្វេសប៊ុកក៏ធ្វើឲ្យគេស្គាល់ច្រើនតៗគ្នាតែម្តង។
យ៉ាងណាមិញ ទោះបីជាមិនមានការរអ៊ូថា ការប្រកបរបរជាជាងខ្មុកស្មាច់ និងដេរប៉ាក់មានលក្ខណៈតជំនាន់នៃគ្រួសារនេះ មានផលលំបាកដល់ការចិញ្ចឹមគ្រួសារមែនក្តី តែសម្រាប់ជំនាន់ក្រោយដែលត្រូវជាកូនៗរបស់អ្នកស្រី ហាក់ដូចជាពុំទាន់មានអ្នកណាចាប់អារម្មណ៍លើជំនាញនេះនៅឡើយ។ ចំពោះការធ្វើគ្រឿងសម្ភារ ខ្មុកស្មាច់គ្រប់សណ្ឋានទាំងនោះ មិនមែនជាកិច្ចការងារដែលមានភាពងាយស្រួលប៉ុន្មានទេ ព្រោះសម្ភារៈមួយចំនួនត្រូវប្រើពេលវេលាយូររហូតដល់រាប់ខែឯណោះទើបសម្រេចបាន ខណៈតម្លៃវិញគឺអាស្រ័យទៅលើទំហំ និងទ្រង់ទ្រាយរបស់វាដែរ គឺមានតម្លៃចន្លោះពីទាបបំផុត ២០០ ដុល្លារទៅដល់ខ្ពស់បំផុតរាប់ពាន់ដុល្លារ។
គួរជម្រាបថា លោកស្រី គុម សុគន្ធា ត្រូវបានគេដឹងថា ក្រៅពីកិច្ចការក្នុងផ្លូវរដ្ឋ អ្នកស្រីព្រមទាំងសិស្សប៉ុន្មាននាក់ បានឆ្លៀតពេលវេលាដ៏មមាញឹក ប្រឹងបង្កើតនូវស្នាដៃថ្មីៗជាច្រើនទៀត សម្រាប់សម្ភារៈសិល្បៈបុរាណ។ ពិសេសជាងនេះ ស្នាដៃលោកស្រី ក៏មានការសព្វព្រះរាជហឬទ័យពីសម្តេចព្រះរាមបុប្ផាទេវីផងដែរ ដោយទ្រង់តែងតែកុម៉្មង់ សម្រាប់ក្រុមរបាំព្រះរាជទ្រ័ព្យរបស់ទ្រង់ជាប្រចាំ៕