(ប៉ារីស)៖ ខ្សែប្រយុទ្ធ Anthony Martial បានដកខ្លួនចេញពីក្រុមជម្រើសជាតិមាន់គកបារាំង ដោយសាររបួសជង្គង់ក្រោយការត្រួតពិនិត្យរបស់គ្រូពេទ្យ គ្រាដែលរូបគេត្រូវមានភារកិច្ចជួយម្ចាស់ជើងឯក World Cup 2018 មួយនេះ លេងវគ្គជម្រុះពានរង្វាន់ប្រចាំទ្វីបអឺរ៉ុប Euro 2020 ចុងសប្តាហ៍នេះ។
បើតាមការប្រកាសដោយសហព័ន្ធបាល់ទាត់បារាំង FFF បានឲ្យដឹងថា Martial ត្រូវបានប្រកាសដកចេញពីក្រុមជម្រើសជាតិ ក្រោយទទួលរងរបួសជង្គង់ខាងស្តាំ នៅពេលដែលបង្ហាញខ្លួនពេញ ៩០នាទីឲ្យក្លឹបអាជីព Manchester United នៃការប្រកួតពានរង្វាន់ FA Cup ទល់នឹង Wolves សប្តាហ៍មុន។
ខណៈនេះក្រុមបារាំងដែលស្ថិតក្រោមការដឹកនាំរបស់គ្រូបង្វឹក Didier Deschamps បានកំពុងតែចាប់អារម្មណ៍ទៅលើខ្សែបម្រើវ័យ ២៣ឆ្នាំ Thomas Lemar ដែលជាកីឡាកររបស់ក្លឹប Atletico Madrid ក្នុងការជំនួសតំណែងនេះវិញក្នុងជំនួបទល់នឹង ម៉ូដូវ៉ា និងក្រុមជម្រើសជាតិអ៊ីស្លង់៕