(ភ្នំពេញ)៖ តារាសម្តែងស្រីជួរមុខរបស់ថៃ អ្នកនាង Margie Rasri ត្រូវបានទស្សនិកជនដឹងថា នាងបានរៀបការសាងជីវិតគ្រួសារ ជាមួយនឹងស្វាមី រហូតទទួលបានកូនក្នុងផ្ទៃជិតគ្រប់ខែ ដែលជាចំណងដៃអាពាហ៍ពិពាហ៍។ អ្វីដែលគ្រប់គ្នាចាប់អារម្មណ៍នោះ គឺគេសង្កេតឃើញថា ទោះបីពោះរបស់នាងកាន់តែធំៗ ពីមួយថ្ងៃទៅមួយថ្ងៃ និងជិតគ្រប់ខែសម្រាលក្តី តែនាងនៅតែទទួលកម្មវិធីកំសាន្តនានា និងមានវត្តមានជានិច្ច ក្នុងសម្លៀកបំពាក់ស្រស់ស្អាត បែបនារីមានផ្ទៃពោះ និងពាក់ស្បែកជើងកែងយ៉ាងមានទំនុកចិត្ត ប្រៀបបានខ្លួនទំនេរ ដូចកាលនៅក្រមុំ។
ថ្មីៗនេះ អ្នកម្តាយដ៏ស្រស់ស្អាត Margie Rasri បានបង្ហាញខ្លួន ដល់អ្នកគាំទ្រតាមរយៈចូលរួម ក្នុងកម្មវិធីជជែកកម្សាន្ត «3zaap» របស់ប៉ុស្ដិ៍ទូរទស្សន៍ថៃមួយ ជាមួយនឹងរូបសម្រស់ស្អាត និងផ្ទៃពោះធំ ជាមួយស្លៀករ៉ូបពណ៌សាច់យ៉ាងសមសួនថែមទៀត ដែលធ្វើឱ្យតារាស្រីរូបនេះ នៅតែលេចធ្លោរក្នុងកម្មវិធី ជាមួយនឹងស្ទីលតុបតែងខ្លួនទាន់សម័យ។ បើនិយាយពីសម្រស់ ត្រូវបានអ្នកគាំទ្រ សរសើរមិនដាច់ពីមាត់ ថានាងពិតជាមានវិធីសាស្រ្តថែរក្សា សម្រស់បានយ៉ាងល្អ ពោលគឺនៅតែស្អាត មិនខុសពីកាលមិនទាន់មានកូនទេ។
គួរជម្រាប់ថា នេះមិនមែនជាលើកទីមួយនោះទេ ដែល Margie Rasri បង្ហាញវត្តមានក្នុងកម្មវិធីកំសាន្តនានា អំឡុងពេលពពោះកូនដំបូង ខណៈជានិច្ចកាលនាងតែងតែចូលរួមមិនចេះដាច់នោះទេ៕