(កណ្ដាល)៖​​ លោកឧកញ៉ា ទ្រី ដាលុច អគ្គនាយករងក្រុមហ៊ុន ទ្រី ភាព គ្រុប និងជាអនុប្រធានគណពង្រឹងយុវជនស្រុកកណ្តាលស្ទឹង ត្រូវជាកូនប្រុសរបស់​ឧកញ៉ា បណ្ឌិត ទ្រី ភាព ទីប្រឹក្សាផ្ទាល់​សម្ដេចតេជោ ហ៊ុន សែន នៅថ្ងៃទី១៧ ខែសីហា ឆ្នាំ២០១៨នេះ បានអញ្ជើញចុះជួបសំណេះសំណាល ជាមួយលោកគ្រូ-អ្នកគ្រូ សាស្រ្តាចារ្យ និងសិស្សានុសិស្សថ្នាក់ទី១២ ទូទាំងស្រុកកណ្ដាលស្ទឹង ចំនួន​៥០២នាក់ ដែលនឹងត្រូវប្រឡងមធ្យមសិក្សាទុតិយភូមិ នៅថ្ងៃទី២០ ខែសីហា ឆ្នាំ២០១៨ នៅពេលខាងមុខនេះ។

ក្នុងឱកាសនោះ លោកឧកញ៉ា ទ្រី ដាលុច បានផ្ដាំផ្ញើ និងចែករំលែកបទពិសោធន៍ សម្រាប់ការត្រៀមមុនការប្រឡងមធ្យមទុតិយភូមិ និងការជ្រើសរើសមុខវិជ្ជាជំនាញ ឲ្យបានត្រឹមត្រូវ សម្រាប់សិក្សាបន្តនៅកម្រិតសកលវិទ្យាល័យ នៅក្រោយពេលប្រឡងជាប់មធ្យមសិក្សាទុតិយភូមិ ដល់សិស្សានុសិស្សទាំងអស់។

ជាមួយនេះ លោកបានប្រកាសផ្ដល់ជូនម៉ូតូ Honda Dream ចំនួន១គ្រឿង ដល់សិស្សានុសិស្សទូទាំងស្រុក ដែលប្រឡងជាប់ និងទទួលបាននិទ្ទេស A និងកុំព្យូទ័រយួរដៃ ចំនួន១ ដែលប្រឡងជាប់ ទទួលបាននិទ្ទេស B សម្រាប់ការប្រឡងមធ្យមសិក្សាទុតិយភូមិ នៅថ្ងៃទី២០ ខែសីហា ឆ្នាំ២០១៨ ខាងមុខនេះ។

ឧកញ៉ា ទ្រី ដាលុច ក៏បាននាំយកនូវការសួរសុខទុក្ខ និងអំណោយរបស់​ឧកញ៉ា​បណ្ឌិត ទ្រី ភាព ផ្តល់ជូនលោកគ្រូ អ្នកគ្រូ សាស្ត្រា​ចារ្យ ក្នុងម្នាក់ៗ ចំនួន​១០០,០០០រៀល សិស្សានុសិស្ស ៤០,០០០រៀល រដ្ឋបាលស្រុក វិទ្យាល័យចំនួន៣ កងកម្លាំងប្រដាប់អាវុធមូលដ្ឋាន និងចំណាយផ្សេងៗទៀត​ ដោយបានចំណាយអស់ថវិកាសរុបចំនួន​៤៥,០០០,០០០រៀល៕