(ភ្នំពេញ)៖ មន្រ្តីតុលាការក្រុងភ្នំពេញ បានថ្លែងឲ្យដឹងនៅមុននេះបន្តិចថា លោក ហេង កេសរោ ចៅក្រមសាលាដំបូងរាជធានីភ្នំពេញ បានប្រកាសសម្រេចដាក់គុក ឈ្មោះ គឹម ម៉ាវិន្ថា អាយុ៥៧ឆ្នាំ ជាអតីតឧត្ដមសេនីយ៍ទោ និងជាអគ្គនាយកក្រុមហ៊ុន ជី អេស ធី ដឹកអ្នកដំណើរ និងមានមុខងារជាឧកញ៉ា និងកូនប្រសាប្រុស និងកូនប្រុសបង្កើតម្នាក់ទៀត ដោយជាប់ពាក់ព័ន្ធនឹងករណីអំពើឃាតកម្មសម្លាប់ ជនរងគ្រោះ២នាក់ម្ដាយនិងកូន ដែលត្រូវជាប្រពន្ធចុង និងកូនស្រីរបស់ខ្លួន កាលពីពាក់កណ្ដាលខែ កុម្ភៈ ឆ្នាំ២០១៤ យកទៅបោះចោលនៅពេជ្រនិល។
ក្រៅពីនោះតុលាការក៏បានសម្រេចឲ្យជនជាប់ចោទផ្តល់សំណងទឹកប្រាក់ ២០ម៉ឺនដុល្លារ ដល់គ្រួសារជនរងគ្រោះផងដែរ។ ដោយឡែកកូនប្រសា និងកូនបង្កើតដែលចូលរួមសមគំនិតត្រូវបានតុលាការដាក់គុក៖ ឈ្មោះ ជា សំណាង ហៅ សុខសំណាង ភេទប្រុស អាយុ៣៦ឆ្នាំ ជាកូនប្រសាប្រុស ជាប់គុក ១៨ខែ និង ឈ្មោះ គឹម សែនរិទ្ធី ភេទប្រុស អាយុ៣៧ឆ្នាំ ត្រូវជាកូនបង្កើតរបស់ឈ្មោះ គឹម ម៉ាវិន្ថា ជាប់គុក ៣០ខែ។
ជនជាប់ចោទទាំង៣នាក់នេះ ត្រូវបានតំណាងអយ្យការអមសាលាដំបូងរាជធានីភ្នំពេញ សម្រេចចោទប្រកាន់ពីបទ «មនុស្សឃាតដោយចេតនាមានស្ថានទម្ងន់ទោស និងសមគំនិត ក្នុងអំពើ មនុស្សឃាតដោយចេតនាមានស្ថានទម្ងន់ទោស»។